مفهوم مالي مهم جدًا هيغير طريقة تفكيرك
فيه مفهوم مالي على قد ما هو بسيط جدا الا إنه قوي جدا جدا، للأسف بلاقي ناس كتير وبيزنس كتير بيحصلهم مشاكل ملهاش حل بسببه ... لو استخدمته صح هتبقى في حتة تانية حرفيا ... مشكلته انه بسيط وواضح بس للأسف الغالبية مبتاخدش بالها منه ... النقدية او الكاش هي أهم حاجة في مالياتك سواء الشخصية او في البيزنس تخللي بالك منها، تحافظ عليها وتكبرها ... الكاش ده الفلوس اللي في جيبك او في البنك قاعدة مبتعملش حاجة خالص جاهزة تشتري بيها أي حاجة ... دلوقتي في وسائل كتير تستثمر بيها الكاش ويجيب عائد بس مش موضوعنا ... ناس بتجري مثلا تدخل تشتري اسهم في البورصة او ذهب او عقار عشان تستثمر او اي اداة استثمارية ... ولو شركة بيجري يشتري بضاعة او خامات ... يا عمي فين الكاش؟؟؟ هي الشركة مش بتعيش عالبضاعة والخامات ... لما تسدد لمورد او تدفع رواتب لازم كاش ... لما تشتري طلبات البيت لازم كاش ... انت أكيد مش هتاكل حيطان عقار ولا سبايك ذهب وفضة 🤭 لازم محفظتك يبقى فيها كاش ... من الآخر كدة زي ما الفطاحل قالوا ... كاش اذ كينج يعني النقدية هي اللي هتقش معاك وتخليك غني فعلا ... بس الكاش ميبقاش زيادة عن اللزوم ولا اقل من الضروري ... تعملها ازاي ديه يا مؤمن؟؟ لازم تمشي على القاعدة ديه ومتغيرهاش أرجوك، وصدقني هتدعيلي من قلبك: مش كل اما يبقى معاك كاش تجري تتخلص منه، فيه ناس وشركات كدة الفلوس بتاكلها ... يجيلوا فلوس يجري يتخلص منها في اي حاجة وكأنها بتاكله ... وبرده يقعد من غير كاش!!! احفظ القاعدة ديه: كل اما تجيلك فلوس كاش فكر كويس أوي أوي ... هو فعلا ضروري اني اصرف منها والا الحاجة ديه ممكن تتأجل او تتلغي؟ ... من الآخر خليك بخيل في الكاش ومتطلعوش الا للشديد القوي ... بخيل في الكاش لان ده شريان حياتك المالية مش بخيل عموما البخل وحش كشخص ... كشركة شغال عادي لانه بيزنس. لازم لو شخص يبقى معاك كاش يعيشك أقله ٣ أسابيع ... ولو شركة حسب النشاط لكن أكيد مش أقل من شهرين تعيش مش محتاح حاجة من حد ...